2.1) la schlittada (las schlittadas) d’eira plü bod in micha cumün engiadinais fich importanta, ün evenimaint central da la populaziun durant il lung inviern, üna tradiziun chi exista amo hoz in ün pêr cumüns. Schlittadas d’eiran evenimaints organisats, ingio cha partecipants nubils e maridats giaivan a la pêra in schlitta in ün cumün daspera per giodair là üna buna tschaina cun bal.

2.2) Chalandamarz es ün’üsanza per iniziar l’on nouv, chi’d es plü co 2000 ons veglia. Il prüm di da l’on nouv, chi d’eira seguond il chalender vegl roman ils prüms marz (caledae martiis), giaivan e van amo adüna noss uffants da scoula chantond e s-chellond cun plumpas e zampuogns tras cumün – a Zuoz e S-chanf da chasa a chasa – per s-chatschar ils noschs spierts da l’on scuors; id es üna ceremonia magica chi fascinescha ed inchanta amo hozindi ils indigens ed ils giasts,

Eir Elena Denoth es fascinada da quista magia; forsa es sia pittura naïva – uschè nomnan divers quista direcziun d’art – sur da quista veglia üsanza, la veglia brama da l’uman per il pür e per l’oriund e natüral ed uschè per quai chi'd es etern. Quist’impreschiun vain lura eir confermada, schi’s sa, cha Elena nu va our il liber per uschedir disegnar giò alch, mo ch’ella disegna e pittura in seis atelier, e quai uschè sco ch’ella vezza il motiv cun seis ögl intern. Uschè as sviluppan seis purtrets caracteristics, unics, s-chets ed originals i’l vaira sen dal pled. Na il stil da la pittura es il decisiv, mobain la genuinità, l’expressiun persunala, las imaginaziuns, las fantasias, ils plaschairs, ils pissers, las temmas e las experientschas dad ella.